Skip Ribbon Commands
Skip to main content
Office of the President
Office of the President>Address to the Nation

Address to the Nation


 SPEECH
 
Message du Président de la République
à l’occasion 42ème Anniversaire l’Indépendance
et 18ème Anniversaire la République
11 Mars 2010
  Chers Compatriotes, Bonsoir.
 
         C’est avec ène grand plaisir, qui mo retrouve moi ici, pou adresse ou mo message, à l’occasion nou 42ème anniversaire de l’Indépendance et 18ème anniversaire nou accession au statut de République.
 
          Thème choisi cette année, pour marque banne célébrations, c’est encore ène fois, ‘nou pays nou fierté’.
         Ce soir, nou tous Mauriciens et habitants des autres île, qui forme parti territoire de la République de Maurice, nou bizin fier, qui petit à petit nou pé vine ène grand nation.  Comme tout bon patriot, nou bizin fier d’être Mauricien.     
         Chaque année, même l’époque, mo vine là pou adresse ou.  Li devoir ène Président pou guide so peuple, et veiller qui tout citoyen so droit li respecter d’après la Constitution. 
Mo banne Compatriotes,
 
         Si aujourd’hui, ou trouve nou pays fine arrive aussi loin dans 42 ans l’indépendance, c’est bien grâce à vision banne dirigeants à la tête du pays, et zotte courage à faire les choses bouger.  Demain, c’est banne jeunes d’aujourd’hui qui pou prend la relève.  Alors nou bizin forme zotte, donne zotte ène bon départ dans la vie.
         Nou, banne grand, nou bizin réaliser, qui souffrance nou fine passé pou arrive jusqu'à là.  Souvent nou énan tendance oublier.  Dans ène seul génération, nou fine sorti planteur, éleveur, guette cotte nou fine arriver.  Nou fine quitte la caze la paille depuis longtemps pou nou habite la caze béton.  Nou fine quitte bicyclette pou voyage dans l’auto.  Aujourd’hui éna beaucoup la cour qui éna plusieurs voitures, parfois éne pou chaque membre de la famille.  Si ou recule en arrière, ou ti pou maginé qui dans 20, 30 ans ou condition de vie ti pou amélioré autant.  Tout ça, c’est grâce à nou manière de vivre en harmonie avec les autres communautés, qui fine amène ène stabilité politique et fine permette le pays progresser.
         Aujourd’hui banne jeunes gens, jeunes filles, avant même commence travaille, zotte fini commence choisir qui l’auto pou roulé.  Parfois ou bizin demandé qui faire, c’est parcequi éna le moyen.  Nou Mauricien, nou ène peuple débrouillard.  Nou bizin continuer dans la même direction. 
         Gouvernement pé faire tout pou ou réussi dans la vie, qui li au niveau l’éducation, formation ou entreprenariat.  Azordi ça quantité madame qui faire business là, li ène gloire.  Chacun pé apprane diboute lor so propre lipied.  Banne missier bizin content, qui zotte madame pé amène ène revenue additionel, qui pé contribuer dans dépense la caze.  Moi, comme Présiden`t de la République, mo pou encourage banne madame, continuer développe zotte ti business. Pou banne qui pas encore décidé, pas bizin hesité, degazé alle faire ou démarche.  Gouvernement là, pou donne ou tout so support, qui li au Ministère de la Femme ou Ministère des Petites et Moyennes Entreprises. 
         Nou pays azordi, fine arrive ène niveau développement qui faire qui plusieurs nations envier nou.
 
Mo Banne Compatriotes,
           Tout ça la finne possible, parcequi nou banne grand parents, fine conne transmette banne valeurs morale, et ça li bien important et bizin continuer.  L’art de vivre parmi différentes communautés, l’art de savoir respecter son prochain, l’art de savoir faire des concessions et autres, fine permette nou tisse ène tissu sociale, qui aujourd’hui fine vine inébranlable. Ça, li réside aussi lors qualité l’éducation qui nou fine gagné.
 
          Gouvernement pé faire tout zeffort possible pou ou zenfant alle l’école et apprane pou vine ène citoyen responsable. L’école gratuit, bus gratuit.    Dans l’école primaire ou gagne livre gratuit et dans certaine école gagne déjeuner aussi gratuit.    Abé qui resté pou ou parent faire, nec habille zenfant là, envoye li l’école.   Grâce à vision nou banne grand parents, qui ti réaliser qui juste l’éducation même pou capave tire nou dans pauvreté, qui nou fine arrive là.    Azordi, nou trouve Maurice pé vine ène Education Hub.  De plus en plus jeunes gagne accès à l’éducation tertiaire.
Mo Banne Compatriotes,
 
         Lors plan économique, zordi nou fine réussi traverse ça période de crise qui le monde fine conné, sans grand l’effet, quand nou conné qui énan banne grand pays fine conne le pire.
         Avec réussite économique, nou grand souci ces jours ci, c’est la drogue.  Maurice inn vine ène centre pou écoule Subutex et autres.  Abé moi mo dire nou bizin protége nous zenfants. Qui parent pou accepté qui so zenfant vine drogué.  Si ou dire non, abé ou bizin daccord qui gouvernement prend banne mesure sévère contre ça banne marchant de la mort là.  Enan dimoune pou vinne raconte zistoire, mais létemps ou énan pou dirige ène pays ou pas badiner.  Létemps ou énan pou prend décision ferme, bizin prend.  Banne jeunes aussi bizin conne dire non à la drogue.
Mo banne Compatriotes,
 
         Gouvernement, li là pou améliore condition dans qui nou vive, nou travail et nou épanoui.  En même temps la population aussi bizin assume so responsabilité.  Depuis ène certain temps nou conné qui climat pé changé.  Pé faire de plus en plus chaud en été et plus frais en hiver.  Ça, li pé affecté tout dimoune dans le monde.  Nou à Maurice nou bizin faire le maximum pou nou protège nou l’environnement, afin d’évite banne risques de maladie.  Nou bizin garde nou voisinage propre, et servi l’energie renouvelable aux maximum.  Gouvernement pé déjà encourage utilisation chauffe eau solaire, et très bientôt, mo pensé, ou pou capave produire ou propre électricité, à travers panneau solaire.  Moi mo dire, nou ti l’île qui nou été, nou bizin vine éne référence en matière protection l’environnement et utilisation l’énergie renouvelable.   Nou bizin éduque nou zenfants couma pou reste bien,   mange sain et garde l’environnement propre.
 
Mo banne Compatriotes,
         Nou démocratie li bien fort, aussi bien qui parfois ou trouve banne dimoune permette zotte faire banne largesse au nom  démocratie.  Abé ça li bien grave.  Ce qui mo pé dire là li applique pou tout dimoune.  Ou bizin énan ène retenue et ène conduite dans la vie.  Ou bizin conné cotte ou droit commencé et cotte li fini et cotte pou ou voisin commencé.  C’est ça la démocratie.
         Mo voeux à cette occasion de célébrations nou fête Nationale, ce qui nou tous, ensemble, nou bizin agir de façon responsable, et qui n’importe ou ça nou été dans le monde, nou fer fierté nou pays.
         Mo souhaite tout Mauriciens, y compris banne qui a l’étranger, aussi bien qui mo banne frères et sœurs de Rodrigues, Agalega et St. Brandon, bonne fête Nationale.
         Mo remercier ou pou ou l’attention.
          Merci et bonsoir
          Vive la République de Maurice.