Skip Ribbon Commands
Skip to main content
Office of the President
Office of the President>Address to the Nation

Address to the Nation


 SPEECH
End of Year Message of the President of the Republic to the Nation
 
Mo banne compatriotes,
Bonsoir,
 
           Comme chaque fin d’année, sa faire moi ène grand plaisir pou adresse ou mo message.   Li ène l’occasion pou nou réfléchi lors ce qui finne arriver au courant de l’année qui pé écoulé et aussi faire nou souhait pou l’année prochaine.
           Mo commence par exprime mo sympathie à la famille Chettiar, suite à décès nou ancien Vice-Président, Angidi Chettiar.  Nou tou conné combien li ti travail pour le pays.  Pou so parti même, li ti ène dé banne dernier vétéran.  Mo aussi exprime mo sympathie à la famille Ramparsad, suite au décès ancien député et PPS Rajman Ramparsad.  Et aussi mo sympathise avec tout les autres familles qui fine passe dans la souffrance perdi ène de zotte proche ou autre.
 
Mo banne compatriotes,
             L’année 2010, mo bizin dire, finne ène l’année assez bien pou nou, Mauriciens.  Pou commencer nou finne participe dans élections générales, qui finne passe dans la tranquillité, et comme toujours dans nou system, se qui finne gagne majorité voix, finne élu.  Nou finne montré encore ène fois au monde qui nou ène peuple instruit et qui nou démocratie marche bien.
 
           Pou moi, comme Président, mo bien satisfait avec le chemin qui le gouvernement finne mette en place pou bouge vers le progrès.  Nou finne gagne ène premier dame comme Vice-Présidente, en la personne de Mme Ohsan Bellepeau.  Sa c’est très bien pou montré légalité des genres et aussi qui l’importance, ou madame, ou énan dans nou société.
 
Mo banne compatriotes,
 
           Laisse mo dire ou, grâce à ou débrouillardise, azordi Maurice pé réussi faire face à banne défi économiques.  Ou conné ou, tou létemps mo finne faire ou confiance, confiance dans banne jeunes.  Faudré ou débrouiller pou qui pays progresser.  Gouvernement li la, ziste pou facilite les choses, mette en place banne services etc.  C’est à ou de profite de sa banne facilités et services là, pou ou arriver.  Mo finne tout les temps dire, qui nou Mauricien, nou ène peuple débrouillard.  A cause sa même qui nous finne arrive côte nou été azordi. Combien pays finne gagne l’indépendance avant nou, mais zotte toujours en arrière lors plan développement économique.  Zotte peuple encore misère, tou sa en dépit du fait qui zotte énan banne ressources naturels et autres.
             Zordi mo fier, quand mo trouve banne jeunes pé communiqué à gauche à droite lor ordinateur, lor portable etc.  Enan so mauvais côté, mais nou bizin guette so bon côté aussi.  Juste pense ène coup, si ène étranger vinne Maurice et li trouve nou pas servie portable ici, réseau même na pas éna.  Mo pas pé dire ou donne ou zenfant ène portable à n’importe qui l’âge.  A ou de voir, mais seulement la technologie, nou pas pou capave sans passe li, sinon nou pou reste arriéré.   Bizin facilite l’accès à la technologie, dans tout domaine.
 
Mo banne compatriotes,
 
           Nou banne zenfants, zotte bizin reste en diapason avec développement dans le monde.  Et moi mo trouvé qui avec la vitesse qui nou pé progresser dans le domaine éducatif, dans encore un peu létemps, nou pou égal à banne pays développés.
             Tou les temps mo finne dire, nou zenfants qui plus précieux pou nou.  A coze sa même gouvernement pé faire tout pou amène l’éducation tertiaire à la porté de chaque zenfant.  Azordi ou trouve l’université pé ouvert partout.  Pou moi, comme Président, tout zenfants égal.  Zotte  tout énan zotte chance pou alle l’école, alle l’université.   C’est ou devoir pou veiller a ce qui ou zenfants alle l’école, faire so devoir et consacrer so létemps dans so l’étude.  Enan beaucoup parents pou vinne dire, mo pas gagne létemps.  Létemps ou mette ène zenfant lors sa la terre là, ou obligé trouve létemps.
 
Mo banne compatriotes,
             En 2010, jusqu'à l’heure mo finne remarqué qui violence familiale et crime finne augmenté.  Mo pensé peut être   a cause développement rapide et le fait qui banne femmes pé vinne plus indépendants, nou société pas pé capave adaptés au rythme.  Et ladans, éna banne zenfants aussi pé souffert.  Gouvernement li là pou apporte so soutien à sa banne famille là, mais zotte bizin conne gère zotte la vie familiale, prend conseil cotte nécessaire.
  Mo banne compatriotes,
             Mo finne constaté qui corruption apé prend l’ampleur dans nou pays.  Sa li ène très mauvais signe.  Ene fois qui corruption finne rentre dans le system, li couma dire ène gangrène, pas facile pou éliminer.   Mo demande banne autorités concernés attaque li aster la même, pas bizin pense deux fois avant agir, parcequi dans ène system pourri, c’est toujours ti dimoune qui paye le pot cassé.  Nou finne trouvé dans les autre pays qui éna corruption, qui arriver, ou pas capave élimine la pauvreté.
             Jusqu'à l’heure nou pays finne faire beaucoup progrès.  Mo pou demande la population alle dénonce tou banne cas corruption et abus de pouvoir si énan.  Ou conné moi mo rêve c’était toujours de faire l’Ile Maurice vinne ène réplica de Singapour, et la nou conné qui nou Premier Ministre aussi finne impressionner par sa pays là.  Alors mo souhaité qui nou tou ensemble nou continuer marche dans la bonne direction.
 
Mo banne compatriotes,
 
           Aster mo pou cause un peu lor banne défi qui pé attanne nou l’année prochaine.  Déjà nou pé  subir conséquence changement climatique, avec ène la sécheresse record.  Nou niveau de l’eau dans nou réservoir finne diminuer drastiquement.  Mo conné qui énan dimoune continuer gagne de l’eau, vu l’endroit qui zotte habiter.  Mais la plupart pé souffert ène manque.  Alors mo demande la population pas faire gaspillage.  Tou dimoune conné l’eau c’est la vie, alors pas gaspille nou la vie,  économiser cotte capave.  Ce qui énan le moyen, mo ti pou dire zotte investit dans un system de captage d’eau personnel.  Dans le future, de l’eau pou vinne ène des banne items plus cher.
 
           Nou bizin aussi commence investi dans l’énergie renouvelable.  Gouvernement comme toujours li là comme facilitateur.  Moi mo ti a souhaité trouve sa banne grand compagnie la commence produire zotte propre l’énergie, en commençant peut être par banne hôtel lor littoral qui gagne plein soleil tout au long de l’année.
 
Mo banne compatriotes,
 
           Enan deux dernier items qui mo pou partage avec ou, avant mo terminer. Ene c’est nou l’environnement immédiat, qui nou vivre et cotte nou travail.  Tou sa campagne qui gouvernement finne faire lor « pas jette saleté », mo continuer trouve dimoune pé jette saleté lor la rue, comme si de rien.  Abé sa banne dimoune là, quand zotte pou comprend, qui bizin paye ène lotte dimoune, pou vinne ramasse zotte saleté.  Moi mo garde l’espoir lor banne jeunes qui plus responsable.
 
           Ene l’autre, c’est la vitesse lor la route.  Même si finne mette limitation vitesse, camera etc., dimoune continuer roule vite.  En cette période de fin d’année, mo faire ène appel à la population, quand boire pas conduire,  et quand ou conduire, respecter banne limite.  Sa ava évite nou pleure banne mort à cause accident.   
Mo banne compatriotes,
 
           Mo énan ène pensée spéciale pou tous nous banne compatriotes de Rodrigues, et banne iles éloignés mais aussi pou nou banne dimoune ki sorti dépi Diego Garcia et Les Chagos.
 
           Mo saisi l’occasion pou présente mo vœux à tous nou banne dimounes ki éparpillé dans le monde.
 
           Mo terminer en souhaitant à la nation Joyeux Noël et une bonne et heureuse Année 2011 et Joyeux Sankranti.
 
           Merci et Bonsoir