Skip Ribbon Commands
Skip to main content
Office of the President
Office of the President>Address to the Nation

Address to the Nation


Message du Président de la République
à la Nation à l’occasion du
41ème Anniversaire de l’Indépendance
et 17ème Anniversaire de la République
11 mars 2009
 
Mauriciennes et Mauriciens
          Bonsoir.  C’est avec beaucoup de plaisir qui mo pé adresse ou, en tant que Président de la République, mo message, à l’occasion 41ème anniversaire de l’indépendance et 17ème anniversaire de la République.
          Ça l’année là encore, le thème choisi, c’est, « Nou pays, nou fierté ».  Ça thème là li reflète l’importance qui le Gouvernement, banne opérateurs économiques et sociales et la population en général, attaché au pays.  Comme tout bon patriot, chaque Mauricien, bizin fier de so pays natal.  Il est vrai, qui acoze situation économique difficile, dans le passé, beaucoup Mauriciens finne besoin alle travail à l’étranger.  Même aujourd’hui, éna beaucoup qui allé pou ramasse un peu d’argent.  Mais couma beaucoup content zotte pays, ou trouve zotte retourné à la fin zotte carrière.
 
Mo banne Compatriotes,
          41 ans déjà, mais mo encore rappelle la lutte pou l’indépendance.  Ça li arrive ène seul fois dans la vie ène pays.  Dans nou cas, nou finne heureux, même si la lutte ti longue et difficile, pas fine éna effusion du sang.  Le peuple Mauricien bisin reconnaissant envers banne ainés, qui finne milité pou nou gagne l’indépendance.  Si zordi ou trouve statue ça banne grand dimounes là un peu partout, se juste pou faire nou rappelle zotte contribution dans l’histoire de nou pays.  Azordi nou éna banne génération qui pas conne ça la lutte pou l’indépendance là.  Si pas raconté, zotte pas pou appranne ditout.  Heureusement, qui nou éna certain écrivains qui finne décrire ça l’époque là.
          Maurice ti dépende principalement lors disik.  Après l’indépendance, pas ti facile, pou faire ène l’économie agricole décollé.   Là mo rende ène vibrant hommage à tous banne travailleurs de l’industrie sucrière.  Zotte éna zotte part de contribution dans le progrès économique de nou pays.   Gouvernement finne insister pou qui tout travailleur concerné par VRS gagne ène portion la terre.  Ceci en guise de reconnaissance zotte contribution.  Mo capave dire ou, qui ça finne amène ène soulagement, dans la vie ça banne travailleurs là.
Mo banne Compatriotes,
          Aujourd’hui mo capave rassure ou, qui l’état finne toujours éna considérations pou banne pli faible. Ça finne apporte nou tranquillité, la paix, l’harmonie sociale et stabilité politique.   Ça  banne facteurs là finne permette nou ti pays avancé économiquement.
          Azordi, cotte plusieurs pays du monde finne déjà rentre dans récession, nou pé encore capave garde la tête en dehors de l’eau.   Tout dimoune bizin prend conscience ce qui pé arrivé dans le monde et prépare zotte pou faire face à ène situation encore pli difficile.  Bizin conne  guête  la  réalité en face.  Bizin prend décisions, qui économiquement saine et évite gaspillage.  Mo sire qui ène peuple débrouillard qui nou été, nou pou capave surmonte nombre de difficultés.  Ça banne sacrifice là, mo dire bien, li applique à nou tous, qui li Gouvernement, secteur privé ou individuel.
          Déjà, mo trouve gouvernement pé prend action positive, à travers Public Health Act.  Couma ou conné, finne interdire consommation l’alcool et tabac dans banne lieu public.  Ça définitivement, li pou diminuer consommation tabac et l’alcool.  Li pou aussi réduire dépense lors traitement banne fumeurs et alcoolique et ène série banne maladies lier à ça.  En même temps, mo penser,  ça ène mesure, qui pou apporte plus la paix dans la famille.
 
Mo banne Compatriotes,
          Grâce à la politique de proximité des gouvernements successifs et à l’encadrement légale et démocratique propice, zordi ou zenfant, li en droit ène bon éducation et accès à la santé de qualité.  Et surtout tous so banne droit constitutionnel li garanti. 
           En ce qui concerne les personnes âgées, zotte bien encadrer par le Ministère concerné.  Zotte pension finne augmenter.  Grâce à ène amélioration nou system la santé, l’espérance de vie même finne augmenter.  Le Welfare State finne consolider  avec  l’avènement  de transport gratuit. Bref, tout sa pou dire ou qui banne conditions de vie finne beaucoup améliorer.  Li vrai qui dimounes plaigne la vie cher, mais pas oublier qui la vie finne cher dans tous les pays du monde.  A Maurice nou import tout ce qui nou besoin et quand sa coûte cher dehors pas capave vende pli bon marché à Maurice.
 
Mo banne Compatriotes,
          Tout récemment, la République de Maurice finne accueillir le Président de la République Populaire de Chine, Son Excellence Hu Jintao avec joie et fierté.  Mo sur qui ça pou èna beaucoup retombé positif lors plan médiatique, touristique, commerciale et nou co-opération bilatérale.     
          Pour le 41ème anniversaire de l’indépendance et le 17ème anniversaire de la République, nou pé accueillir comme Invité d’Honneur, le Président de la République de Botswana, Son Excellence Lieutenant Colonel Seretse Khama Ian Khama.  Mo souhaite li ène bon séjour à Maurice.  Ça visite là pou aide à consolide et raffermir davantage les liens d’amitiés et commerciales entre les deux pays.        
          Maintenant nou  éne République qui pé gagne 17 ans.  Nou besoin développe banne qualité, qui pou permette le pays traverse banne périodes difficiles qui pé profilé à l’horizon.   Mo finne toujours faire ressortir, qui, nou comme parents, nou seulement de passage lors ça la terre là.  Etant donné qui ça appartenir à nou banne zenfants, nou besoin faire de sorte, pou quitte li dans ène pli bon l’état, qui nou ti hérité.  Nou besoin continuer prend compte nou l’environnement.  Déjà Gouvernement finne mette en place ène projet, Maurice - Ile Durable, pour servi l’énergie renouvelable.  Aussi, mo apprécié, qui pé montré banne zenfants l’école, comment faire tri banne déchets.
 
Mo banne Compatriotes,
          Ça c’est mo message à l’occasion de 41ème anniversaire de l’indépendance et 17ème anniversaire de la République.  Mo souhaite tous Mauriciens, y compris, banne qui à l’étranger, ainsi que mo banne frères et sœurs de Rodrigues, Agalega et St. Brandon, bonne fête Nationale.  Anou marche ensemble pou bâtir ène République de Maurice encore meilleur pour le pli grand bonheur de nou peuple et de nou zenfants.
          Mo remercier ou pou ou l’attention.                
          Merci et Bonsoir